Աղանդավորները թիրախավորում են արցախահայերին
Հայաստանում ակտիվացել են աղանդավորները. ահազանգում են հոգևոր հայրերը:
Կա մտահոգություն, որ նրանք հատկապես թիրախավորում են Հայաստանում ապաստանած արցախահայերին՝ օգտվելով իրավիճակից, որ մեր հայրենակիցներն ունեն սոցիալական ու հոգեբանական խնդիրներ:
Կեղծ «բարեգործություն» ու «հոգեբանական օգնություն». մարդկանց իրենց շարքեր ինտեգրելու համար՝ հայտնի մեթոդներից են: Դրանք այսօր էլ հաճախ կիրառվում են, նշում է Սրբոց Նահատակաց եկեղեցու հոգևոր հովիվ Տեր Բարդուղիմեոս քահանա Հակոբյանը:
Սոցիալական վիճակից ելնելով՝ արցախահայերին խոստումներ են տալիս կամ տրամադրում ինչ-որ օգնություն, սակայն դրա հետևում թաքցնում այլ բան, նկատել է քահանան:
«Մարդկանց սոցիալապես օգնելով՝ պարտադրում են մասնակցել իրենց հավաքներին, ինտեգրվել իրենց շարքերը»:
Զգոն լինենք, որ չընկնենք ծուղակը
Տեր Բարդուղիմեոսի խոսքով՝ բարդ իրավիճակ է, քանի որ չես կարող արգելել մարդկանց «բարեգործություն» անել կամ օգտվել «օգնություն»-ից: Քահանայի խորհուրդն է՝ զգոն լինել.
«Մարդիկ պետք է ուշադիր լինեն, թե որտեղից է գալիս օգնությունը: Սա նույնն է, երբ սատանան մոտենում է և առաջարկում որևէ խնդրի լուծում, բայց մարդ, իմանալով, որ ճանապարհը չար է, հրաժարվում է: Պետք է ցուցաբերել այդ կամքի ուժը: Մարդիկ կարող են օգտվել, բայց թույլ չտալ, որ այդ սոցիալական օգնությունը վերածվի հոգևոր զրույցի»:
Աղանդավորներն օգտվում են նաև մեր հայրենակիցների ծանր հոգևիճակից, նկատում է Տեր Բարդուղիմեոսը.
«Գտնում են խիստ նեղության մեջ գտնվող մարդու՝ ճնշված հոգևիճակով: Փորձում են Աստծո խոսքի անվան տակ բավարարել հոգևոր ճնշվածությունն ու սրանով կախման մեջ են գցում»:
Կեղծ փրկիչների մասին Աստվածաշնչում ևս զգուշացվում է: Պողոս առաքյալը նշում է.
«Ուրիշ ավետարան չկա, այլ միայն կան ոմանք, որ ալեկոծում են ձեզ և ուզում են խեղաթյուրել Քրիստոսի Ավետարանը»։ (Գաղ. 1:7)
Փողոցներում կարելի է հանդիպել աղանդավորների, որ ներկայացնում են հոգևոր թեմայով տարբեր գրություններով պաստառներ: Ցավոք մարդկանց այստեղ հոգևորսությունից պաշտպանելը բարդանում է, քանի որ օրենքի կարգավորումները հստակ չեն, թեև ըստ օրենքի՝ Հայաստանի Հանրապետությունում հոգևորսությունն արգելվում է:
Տեր Բարդուղիմեոսի խորհուրդն է՝ աղանդավորների հետ զրույցի չբռնվել:
Ըստ քահանայի՝ աղանդավորական խմբերի անդամները հիմնականում ընտրում են հետաքրքիր վերնագրեր՝ մարդկանց հետ զրուցելու համար, իսկ նրանց հետ պետք չէ անգամ վիճել: Այդ դեպքում կարող են տպավորություն ստեղծել, թե տուժող են, ենթարկվել են բռնության: Եղել են դեպքեր, երբ քահանան փորձել է բացատրել նրանց, բայց անօգուտ: Ոստիկանությունից էլ հայտնել են, որ նրանք կարող են կանգնել փողոցում, սակայն իրավունք չունեն որևէ մեկին կանգնեցնելու և զրուցելու:
«Եթե փողոցում կկանգնեցնեն և կզրուցեն, կփորձեն առաջին քայլը անել, սա արդեն կարող է որակվել որպես հոգևորսություն: Կարելի է դիմել պատկան մարմիններին»:
Տեր Բարդուղիմեոսն առաջարկում է հարցը լուծել միասնական ուժերով: Համայնքի բնակիչները կարող են ստորագրահավաք կազմակերպել, դիմել պատկան մարմիններին՝ նշելով, որ չեն ցանկանում աղանդավորներին տեսնել այդ տարածքում:
Անի Ավագյան
- 2023-11-21