Մեկնարկեց Ավագ շաբաթը՝ Տիրոջ երկրային կյանքի կարևոր իրադարձությունների՝ չարչարանքների, խաչելության ու հրաշափառ Հարության շաբաթը: Այս շրջանի յուրաքանչյուր օրն ունի իր հատուկ պատգամը:

Բարի, առաքինի գործերով զարդարենք մեր կյանքը. շաբաթը սկսվում է այս խորհրդով:

Ավագ երկուշաբթի. չլինե՛լ անպտուղ՝ անիծված թզենու նման

Ավագ երկուշաբթին խորհրդանշում է արարչության երկրորդ օրը, երբ Աստված արարեց երկնքի հաստատությունը:

«Աստված ասաց. «Ջրերի միջև թող հաստատություն լինի, և թող ջրերը բաժանվեն ջրերից» (Ծննդ. 1:6):

Արաբկիրի Ս. Խաչ եկեղեցու խորհրդակատար Տեր Բաբկեն քահանա Հայրապետյանի խոսքով՝ օրը մեզ նաև պատգամում է չլինել անպտուղ՝ անիծված թզենու նման:

«Անիծված թզենու» պատմությունը հիշատակվում է Ավագ երկուշաբթի առավոտյան՝ ժամերգության ընթացքում: Ըստ Ավետարանի՝ Հիսուս, Բեթանիայից Երուսաղեմ վերադարձին, քաղց է զգում, մոտենում է մի թզենու, որի վրա բացի տերևից ոչինչ չի գտնում ու ասում է. «Այսուհետև քեզնից հավիտյան թող պտուղ չլինի» (Մատթ. 21:19 ): Թզենին նույն պահին չորանում է: 

Անպտուղ թզենին խորհրդանշում էր Հին Ուխտի շրջանը, բացատրում է Տեր Բաբկենը: Մարդիկ ունեին օրենքներ, ամեն բան արտաքինից կատարյալ տեսք ուներ՝ տերևազարդ թզենու նման, սակայն իրականում դատարկություն էր: Օրենքներին հետևում էին տառացիորեն, սակայն դրանց ոգուն մնում էին անհաղորդ։ 

«Նա թզենու օրինակով սովորեցրեց, որ մարդու հավատը չպետք է լինի միայն խոսքով, եկեղեցի մտնել, մոմ վառելով: Պետք է բարի պտուղներ տալ: Աստված մեզնից միշտ ակնկալում է բարի գործեր»,- նշում է քահանան:

Աստվածաշնչում նշվում է՝ «Հավատն առանց գործերի մեռած է»: 

Պետք է օգտագործել մեզ տրված շնորհները

Յուրաքանչյուրը ստանում է շնորհներ, բայց արդյո՞ք բոլորը դրանք օգտագործում են, կամ ի՞նչ նպատակով ենք դրանք կիրառվում: Քահանան խորհուրդ է տալիս Ավագ երկուշաբթի խորհել, եթե զգում ենք, որ հոգեպես հիվանդ ենք, բարի գործեր չենք անում, պետք է գտնենք այն ուղիները, որ մեզ կդարձնեն պտղաբեր: Օրը կարծես խորհրդանշի Տիրոջ ակնկալիքը մեզնից: 

«Մեզ տրված շնորհները զորացնո՞ւմ, բազմապատկո՞ւմ ենք, մեր մերձավորին օգնո՞ւմ ենք, հայրենիքը սիրո՞ւմ ենք, բարիք ստեղծո՞ւմ ենք: Պետք է օգտագործել մեզ տրված շնորհները»,- նշում է հոգևորականը:

Անի Ավագյան